Schlagwort-Archive: seetag

Seetag

Seetag

Hüt hämmer de erst vo zwei Seetäg und mir händ eus uf en ruhige Tag igstellt. Wo mir gester Abig ufs Zimmer cho sind, hämmer 3 Iladige uf em Bett gha. Die erst hämmer gwüsst: en herrlichi Massage mit Öl und Salzpeeling am 09.30h. Die zweit isch en Besichtigung vo de Schiffsbrugg gsi am 11i (sehr interessant) und die dritt en Iladig vo de Liz, en Lady us Texas, wo hüt en Privatparty fiired am halbi 6i. Die Dame schmeisst doch tatsächlich uf dem Schiff, wo fast alles ussert Kaviar, Dom Pérignon und 1998er Château Margaux inklusiv isch, en eigeti privati Party uf Ihri Rächnig und mir sind au debii 🙂 Die gwüssne Persone händ eifach z’viel Kohle ;-). Mir sind gspannt, was für exklusivi Häppli und welle Luxus-Champagner Eus erwarted *zwinker*!! Jetzt hämmer grad Lunch am Pooldeck gha und aschlüssend isch Fulänze uf em Ligistuehl agseid, das mir den fit sind für die Party ;-). Mir sind übrigens 1 Grad 14 Minute und 53 Sekunde nördlich vom Äquator! Es isch liecht bevölkt, was Eus grad rächt isch. Gester hämmer rächt Sunne tanked. Au isch d’Temparatur mit 27,1 Grad hüt wehsentlich agnehmer mit enere schön chüelende Meeresbriise :-). Mir händ da würklich alles, ussert Vorwiehnachtsstimmig 😉 Entspannti Grüessli S&M

Cochin

Nachemene ruhige Seetag sind mir gester Abig am Tisch vo de Saskia, d’Chefin für Passagier-Betreuig iglade gsi. Herrlich ämüsant mit viel Gschichte übers Läbe und komplizierteri Gäst als mir on Board ;-). Mir sind denn gli go pfüsele, will hüt isch Cochin uf em Programm gstande. D’Akunft und d’Immigration sind echli verzögered gsi. Aber immer no im grüene Bereich! D’Strasse vo Cochin sind no es bitzeli chaotischer als in Mumbai (und das söll öpis heisse!) D’Devise luutet: „wenn öper Huped, gah schnell uf d’Ziite, er brämsed nämlich ned!“ Und Euse Driver hed fast nume ghupet! So sind mir zügig 2 Stund zum Huusboot (nur gflochte, ohni Nägel usw.) gfahre und händ nach viel Hektik uf de Strass en entspannendi Tour uf dem unändliche Kanalsystem gmacht.

Cochin

Wunderschön :-), ned z’Zletscht wills da pro Iwohner mind. 5 Palme git (die Höche mit Kokosnuss) und das überall, au entlang vom Flussufer. Herrlich!!! Denn chan mer Lüüt beobachte, wie sie Wösch wäsched, Gschirr abwäsched, bädeled oder is Wasser brünzled (kei Witz!). Mir sind mit himmlisch Ananasstückli ideckt worde. D’Frücht sind halt scho besser, det wo sie wachsed. Nachemene Stopp imene Hotel mit feinem indischem Ässe isch es denn zrugg gange. Mir händ no en Halt bi de berühmte chinesische Fischernetz gmacht und chönne schöni Föteli schüsse. En super Tag und jetzt heissts: Good by India. Morn isch wieder en Seetag agseid und denn erwarted Eus Colombo :-). Alles isch bestens und mir händ übrigens hüt vor eim Monet Eusi Hichziit gfiired 🙂 Liebi Grüess us um tropische Cochin S&M