Mahe

Gester Morge sind mir mit em erste Tender uf Curieuse gfahre. Diräkt am Strand simmer usgstige und händ Eus ufene 1.7 km lange Spaziergang begeh. Ihr chönd Euch ned vorstelle, wie unglaublich heiss und füecht das gsi isch. Am Markus sis T-Shirt hesch chönne uswinde und mis Badchleid isch nass gsi ohni bädele ;-). Aber d’Strapaze händ sich def. glohnt. Irgendwie so stell ich mir s’Paradies vor: en einsami Bucht mit türkis blauem Wasser, schneewiisem Sand, umgeh vo phantastische Granitsteiformatione und echli wiiter obe läbed Riiseschildchröt. D’Insle hed kei eigentl. Infrastruktur und fast kei Lüüt. Vo Eusem Schiff isch au fast niemert a Land cho und so hämmers vo A-V + X-Z gnosse. Leider hed s’W wie Wasser gfehlt. De Liter, wo mir mitgnah händ, isch z’knapp bemässe gsi. Uii, händ mir Durst gha 🙁 Aber das isch würklich s’einzige gsi. Mir händ i dere Bucht bädeled und sind gmüetlich im Wasser ghöckled und zwüsched de Granitfelse hi und her gloffe. En absolute Traum :-). Schweren Herzens sind mir denn mit em letschte Tender wieder an Bord gange. Mir hätteds no länger usghalte. Denn sind mir en Stund uf La Digue gfahre und händ euses Flüssigkeitsmanko wet gmacht und en Snack vo de Poolbar uf eusem Suitebalkon gnosse, serviert vom Mustafa, eusem Buttler. Denn hämmer en Powernap gmacht und am 15h simmer für La Digue pronto gsi. Det hämmer es Velo gmieted und sind Richtig „Grand Anse Beach“ losgradled. Die Bucht isch mänscheleer und wieder unglaublich schön gsi. D’Ströhmig det isch rächt stark und so hämmer nur nöch bim Ufer bädeled. D’Kulisse mit Granitfelse hed es wiiters mal fast kitschig usgseh und isch vo Eus i allne erdänkliche Positione fotografiert worde. Wo sich d’Sunne langsam afag sänke hed, simmer wieder zrugg gstrampled und Eusi Füdli händ extrem weh gmacht, wo mir wieder im Hafe gsi sind. Nachemene wiitere köstliche Nachtässe, hämmer Eus scho am 22h ufs Ohr gleid. Nach so viel Sunne, Meer und Idrück sind mir komplett uf de Stümpe gsi. Jetzt sind mir uf Mahe. Am Morge hämmer echli gshopped aber wills so heiss isch, gömmer am Nomittag wieder go bädele :-). Liebi Grüess S&M

Schreibe einen Kommentar

Deine E-Mail-Adresse wird nicht veröffentlicht. Erforderliche Felder sind mit * markiert.

Diese Website verwendet Akismet, um Spam zu reduzieren. Erfahre mehr darüber, wie deine Kommentardaten verarbeitet werden.